الماضي احلى

كنت اضل افكر بموضوع لما اروح اول يوم عالمدرسة ،، اذا رح يغيرو صحابي اللي كانو معي بالصف ،، هسا رح اكون لحالي بالصف بعرفش حدا ،، و يمكن يقعدوني اخر دُرج ومش جنب الشباك !! 
قبل المدرسة بيوم كان في تحميم ،، التحميمة هاي قوية شوي ،، كانت الوالده تعمل فينا معركة بالحمام ،، مشان تفتيش القمل وهالقصص ،، غير انك تروح عالحلاق ،، وتضل ماسك بالنص ليرة لما تعرق ايدك ،، و تقولو بسلم عليك ابوي و بحكيلك احلقلي حلاقة مدرسية !! 
تخطس بكرسي الحلاق زي الضفدع ،، و يخنقك الحلاق بالشريطه اللي بلفها ع رقبتك ،، بكون وجهك احمر و عرقان و مش مسترجي تحكي كلمة ،، و اذا مرّو ولاد الحاره من باب الحلاق و صارو يتخوتو ،، و يضحكو ،، بعرفش ليش ،، قال وينادو بعض يتفرجو !!

اول يوم مدرسة فش مصروف لأنو فش مقصف ،، بتوخد معك شنته فاضيه ،، طبعا الشنته نفسها تبعت قبل ٤ سنين و يتوارثها الاجيال ،، السحّاب مخيّط ،، و ريحة الشنته زعتر ،، و بَري قلام رصاص ،، الشنته الفاضيه مشان اذا سلمّونا كُتب ،، نمسك كتاب الرياضيات الجديد و نفتحو لنصّو قال ونشوف انو الدروس صعبه ،، و ندّور ع درس القسمة الطويله و نتدايق انو كيف بدنا نعرف نحّلو ،، و نمسك كتاب العربي و نشوف القصائد الحفظ كم بيت !!

وبنطلون المدرسة يا طويل ، يا قصير ، مستحيل يكون زابط عالمقاس ،، لأنو اصلا مش الي !!

كل استاذ يطلب منّا دفتر للماده ،، كلهم دفاتر ٣٢ ورقة ،، الا العربي يطلبو ٦٤ ورقة ،، مع دفتر الطَبيعة ،، دفتر الطبيعة غالي ،، حقو بريزه كان وعليه صورة الملك حسين ،، و اللي ما بقدر يجيب دفتر طبيعة ،، كنا ندهن الصفحه زيت مشان تصير شفّافه ،، نوخد الكتب الجداد عالدار ،، مشان التجليد الرخيص اللي لونو اصفر ،، واللي ما معو بجلّد بجرايد ،، اللي معهم مصاري و ابوه مسافر عالكويت كان يجلّد لزّيق شفاف من الأصلي مع طوابع سوبر مان !!

انا مرّة جلدت بجرايد ،، وعلى حظي صفحة الجريده كانت صفحة الوفيات ،، عن عمر يناهز ٥٧ عامًا !!

ثاني يوم نوخد البرنامج ،، اهم يوم اللي فيه مهني مهني ، و رياضه ،، 
المصروف بس كان شلن بدون سندويشه ،، اذا مع سندويشه بتوخدش شلن ،، انا مرات اطلب شلن ،، و مرات سندويشه زعتر بكيس اسوّد كلو زيت مع خياره برضو كلها زيت ،، و اللي ابوه معو مصاري يجيب سندويشه مرتديلا ،، الكل كان يصاحبو مشان السندويشه و بالعاده بكون شاطر ،، هاد كان محسود ،، غني ، و شاطر ، وحليوه ، وبنطلونو مكوي ،، ومعو ساندويش مرتديلا !!

بيقولو هسا صار في مهرجان العودة للمدارس ،، و حصص سباحة وباليه ،، و آي باد وفش دفتر طبيعة ،، وشناتي الها عجال ،، وانجليزي و فرنسي ،، واللوح بروجيكتر و داتا شو ،، فش طباشير ومساحة لوح يكتوها عباب الصف !!

حتى بيقولو اسم المدرسة تغير ،، مدرستي كان اسمها الامام البخاري ،، هسا اسم المدرسة ٣ احرف انجليزي مع جكيت ،، والمدرسة ستاتي رجالي!!

انا داري